إحذر من أخطاء انترفيو التليفون التي قد تفقدك الوظيفة

بعت سيرتك الذاتية وعجبت الـ HR وكلموك 🙂 هاتقول ايه في انترفيو التليفون وأهم النقط الي المفروض تاخد بالك منها ؟؟؟

8 حاجات احترس منهم أثناء مقابلات التوظيف عبر الهاتف Phone Interview

شركات كتير بقت بتلجأ لمقابلات التوظيف من خلال التليفون
توفيرًا للوقت والنفقات
لكن النوع ده من المقابلات بيكون العبء الأكبر فيه على المتقدم للوظيفة
عشان كده لازم تكون مستعد في المرة الجاية اللي تستقبل فيها واحدة من مقابلات التوظيف الهاتفية

دول 8 حاجات لازم تحترس منهم أثناء مقابلات التوظيف عبر الهاتف

1-مكان المكالمة
أثناء الرد على المكالمة لازم تتأكد إن المكان اللي هتتكلم منه هادي بدون أي أصوات في الخلفية
وده هيساعدك على التركيز في مكالمتك وهيسيب انطباع إيجابي عند مسئول التوظيف

2-الحديث عن حياتك الشخصية
لو متمش سؤالك عن أي تفاصيل في حياتك الشخصية بشكل مباشر فالأفضل إنك متتكلمش عنها
لإن مقابلات التوظيف الهاتفية هدفها الأساسي معرفة خبرتك العملية وملائمتها للوظيفة

3-عدم التفرغ للمكالمة
في بعض الأحيان بنرد على التليفون أثناء استخدام الكمبيوتر أو ممارسة أي نشاط تاني
لكن مسئول التوظيف هيلاحظ بسهولة درجة تركيزك وانتباهك أثناء المكالمة
عشان كده الأفضل إنك تتفرغ لها

4- الحديث عن المرتب
مناقشة المرتب المتوقع مش وقته المناسب في مقابلة التوظيف الهاتفية
الأفضل إنك تأجله لما تتقبل وتنتقل للمرحلة التالية من عملية التوظيف

5- وضع مسئول التوظيف على الانتظار
من غير المقبول إنك تقطع مكالمتك لاستقبال مكالمة تانية
وفي حال إنك عندك ظروف طارئة أو منتظر مكالمة مهمة فإنت ممكن تقول لمسئول التوظيف من بداية المكالمة أو تطلب تأجيل المقابلة

6- الإسهاب والتطويل
ركز إن إجابتك تكون مختصرة ومركزة
فمفتاح النجاح في مقابلات التوظيف الهاتفية هي الإجابات الموجزة الوافية من غير أي إسهاب أو تطويل

7- المقاطعة
احترس إنك تقاطع مسئول التوظيف حتى لو لتصحيح معلومة أو للرد على سؤال
الأفضل إنك تستنى انه ينهي كلامه وبعدها ترد
لإن خلال المكالمة بيتم تقييم قدرتك على الاستماع الفعّال

8- عدم طرح الأسئلة
في نهاية المقابلة عادة بيتم سؤالك لو عندك أي اسئلة
فالأفضل إنك تسأل اسئلة عن دورك الوظيفي أو التحديات اللي ممكن تقابلك
لكن عدم توجيه أي اسئلة هيدي انطباع إنك مش مهتم بالوظيفة زي الأسئلة عن الأجازات والمرتب ,فالأفضل تأجيل هذه الأسئلة للمقابلة التالية المباشرة.