طريقة إيجاد الوظيفة المناسبة أو عمل كاريير شيفت ؟

طريقة إيجاد الوظيفة المناسبة أو عمل كاريير شيفت ؟

بكل تأكيد الجميع يبحث عن وظيفة أو فرصة عمل مناسبة تكمنة من العيش في مستوي إجتماعي أفضل أو حتي تلبية إحتياجاتة اليومية والشهرية مع وضع إجتماعي صعب في جميع الدول العربية فتطوير المهارات أصبح ضروري والعمل لفترات أطول والتنقل من وظيفة لأخري أصبح سمة عن الوضع السابق الذي يبحث فيه الناس عن الإستقرار والإستمرار في الوظائف.

حالياً التفكير إتغير كتير وفكرة الكاريير شيفت (Career Shift) بقت ممكن تتعمل أكثر من مرة في حياتك لكن لازم نفهم الأول يعني إيه كارير شيفت

ليه محتاج تعمل كارير شيفت

كتير بنشوف خريج جديد مش لاقي نفسه في المجال إلي أتخرج منه أو حتى مش متخيل نفسه بعد التخرج بيشتغل بالشهاده دي ودا لأن بعد المرحلة الثانوية أنت مبتكونش مخير تدخل في أي تخصص بل بيفرض عليك كليات معينة حسب مجموعة (انت جايب كام % و دول يكفوك تدخل ايه) بعيد بقى عن هواياتك او موهبتك و طبعا نتيجة لصغر سننا في المرحلة دي احيان كتيره بنختار الاعلى مش الأنسب واللي بعد كام سنه و مع نضجنا السني و العقلي بنبدأ نكتشف اننا كننا غلط.

اكتشافك الغلط ده بيكون سببه حاجه من اتنين, الأولى انك تكون عندك هوايه او موهبه و بدأت تطغى عليك و بالتالي بتهرب ليها بغض النظر عن حبك او كرهك لدراستك و تبدأ أولوياتك تتغير فتبدأ هوايتك تبقى هي الأساس و دراستك هي الحاجه الثانويه. الحالة الثانيه هي انك تحس انك مش لاقي نفسك في كليتك أو تحسها صعبه عليك أو مش بترضي احتياجاتك و بالتالي تبقى عايز تشغل نفسك في اي حاجه تانيه تهون عليك فترة الدراسة و مبيكونش عندك وجهة واضحه فتجرب حاجات كتير بين أنشطة و مشاريع و غيرها وغالبا بتنجح في أغلبها لأنك بتحول كم هائل من الطاقه السلبيه لحاجه انت بتحبها بس بتفضل ديما حاسس ان المستقبل مجهول لأنك على يقين انك بتضيع وقتك بس لمجرد الهروب من واقع كرهك لمجال دراستك وبيفضل ديما جواك حيرة هتعمل ايه بعد ماتخلص.

لو انت شخص من الحالتين اللي فوق دول فلازم تبقى فاهم ان حالتك هي حالة تخبط طبيعية في بداية حياتك العملية لا تخضع لمصطلح ( Career shift) .

الكارير شيفت معناه انك بالفعل بتشتغل في مجال و مستقر فيه بس وصلت لمرحلة انك اما لازم تغير المجال ده لمجال جديد او انك هتبدأ تفشل فيه و ده بيكون غالبا بسبب من ثلاث اسباب

اولا ان ادارة المكان اللي انت فيه متعنته او انها بترهق امكانينك و تحملك فوق طاقتك لدرجة توصلك انك غير قادر على العطاء
ثانيا انك تحس انك لسه موصلتش لحلمك او مش عارف تستثمر قدراتك في المكان اللي انت فيه
ثالثا انك تكون بتشتغل في شغلانه بدأت تنتهي او بدأت تستبدل بأجهزه الكترونيه و نظم حديثة و ده يهدد مستقبلك المهني و هنا بتختار انك تمشي لمكان جديد أو لمجال وظيفي مختلف.

نرجع مرجوعنا كيفية إيجاد الوظيفة المناسبة أو عمل كاريير شيفت ؟

ناس كتير دايما بتبعت تسألني عن ايه افضل مجال يشتغلوا فيه او ازاي يقدروا يحددوا الكاريير اللي ممكن يشتغلوا فيه وناس تانيه بتسأل لو عايز يعمل شيفت كاريير يعمل ايه

طبعا انا مش احسن حد يدي النصايح دي بس من خلال التجارب اللي مريت بيها واحتكاكي بالسوق كل يوم ومتطلباته خليني اقول كام حاجة كده اتمنى انها تكون مفيده

خلونا الاول نتفق على شويه ثوابت كده عشان سقف التوقعات ما يقعش علينا 😀

– مش مهم انت معاك شهادة ايه المهم انت بتعرف تعمل ايه وتحب انك تشتغله

– مافيش حاجة اسمها هتخرج واشتغل في وظيفة بكام الف جنيه او دولار واقعد على مكتب في التكييف واخبط بايدي على المكتب واقول الاجتماع انتهى اتفضلوا يا حضرات 😀

– الواسطة ممكن تنفع شوية في بعض الوظايف بس مش ممكن تنفع على طول لو انت مش كفء او اهل للوظيفة دي

– العالم ما بقاش بتاع شهادات

– كله اللي خدته في الكليه حمادة وسوق العمل حمادة تاني خالص

ندخل بقى على السؤال المهم ايوة يعني انا عايز اشتغل اعمل ايه بقى ؟

– اول حاجة لازم تحدد المجال اللي انت حابب تشتغل فيه لانك لما بتشتغل في حاجة بتحبها هتبدع فيها

– ابدأ ذاكر الحاجة اللي حابب تشتغل فيها ويفضل لو الخطوة دي تحصل من وانت لسه طالب في الكلية

– اختار مجال تقدر تتميز فيه مش شغلانه وخلاص

– شوف السوق محتاج ايه وابدأ اتعلم الحاجة دي وطبعا اكتر الحاجات المطلوبة دلوقتي ( البرمجة ، التصميم ، تحليل البيانات، ال Digital Marketing ، Artificial Intelligence , E-commerce jobs و Automation)

وغيرها من الوظائف المطلوبة جدا دلوقتي

– اللغة اللغة اللغة ثم اللغة مش بس للشغل لا كمان عشان تعرف تتعلم بيها

– انزل اشتغل حتى لو ببلاش وخد تدريب ان شالله مجاني في شركات وانت لسه طالب على ما تتخرج هيكون عندك سي في محترم

– اشتغل فري لانس جنب دراستك هتاخد منها خبرة كويسه بردو وهتتعلم كتير

– اي مجال بقى له الكورسات بتاعته اونلاين واوفلاين والانترنت مليان معلومات كل اللي عليك انك ت google it مش محتاج تسأل حد ابحث بنفسك هتوصل لمليون معلومة

– مافيش حد بيبقى Expert و Consultant و Trainer من كام فيديو شافهم ولا شوية مقالات قراهم ولا كام كورس اخدهم وتبدأ تعمل الشو المعتاد بلاش والنبي عشان الناس دي بتطلع بسرعة اوي وتقع بسرعة اوي واسمك بيتحرق في السوق بسرعة دي نصيحة لوجه الله والله

– ماتتخدعش وتنبهر ببعض الاشخاص على السوشيال ميديا لمجرد انهم عارفين يعملوا شو حلو وتمشي وراهم وانت مغمض دايما google وشوف الكلام ده صح ولا اي هري او هبد عشان التريند 😀

– مش معنى انك شاطر في حاجة تروح تفتح شركه وستارتب على الحاجة دي لان الموضوع والله اكبر من كده بكتير فبلاش تاخد الخطوة دي بدري اتقل كده واتعلم وخد كل الخبرات اللي محتاجها الاول وبعدين اعمل اللي انت عايزه بخطوات مدروسه

– اللي عايز يوصل لازم يتعب فاتعب على نفسك واشتغل عليها واوعى توقف تطوير من نفسك مهما وصلت من مناصب او خبرات حركة السوق بقت اسرع مما تتخيل وكل يوم في جديد وفي وظايف ابتدت تندثر وفي مجالات جديدة بتظهر فلازم تواكب الجديد وتبقى متجدد دايما

– اسمك في السوق مهم ومافيش حاجة بتستخبى في الماركت فحافظ على اسمك بانك تقدم حاجة محترمة ليها قيمة بلاش مبدأ اخطف واجري لأن مع الوقت هيتعرف انت مين وبتعمل ايه

– اهتم بلينكيدان بتاعك جدا ابني شبكة علاقاتك عليه واختارها بعناية وخليك اكتيف عليه بشكل يومي

– دول علي وظيفة وإبحث عن وظائف اليوم وشوف

وابعت لكل الوظائف المناسبة وانزل اعمل مقابلات مهما كان عددها كل مقابلة بمثابة خبرة جديدة تضاف ليك.

الناس اللي عايزة تعمل شيف كاريير حابة اقولهم بس اوعى تسيب شغلك فجأة وتشيفت كاريير الا لو معاك اللي يعيشك فترة زمنية كويسة ممكن توصل لثلاث أشهر انت ممكن تتعلم وانت في شغلك عادي الحاجة اللي حابب تنقلها ، لو مش هتفتح البيزنس الخاص بيك اشتغل فترة فري لانس جنب شغلك ولما الدنيا تظبط ممكن بعدها تنقل للوظيفة اللي انت عايزها لي اصدقاء كتير اخدوا الخطوة دي بالتدريج ده والحمد لله ناجحين جدا ماشاء الله

اخر حاجة هختم بيها افضل مواقع ممكن تتعلم منها في مجالات مختلفة:

Coursera

Lynda

Udemy.

Udacity.

Khan Academy.

Codecademy.

Bloc.

iversity

Skillshare.

افضل مواقع لشغل الـ Freelancing

Upwork.

Toptal.

Elance.

Freelancer.

Craigslist.

Guru.

99designs.

Peopleperhour.

Freelance Writing Gigs

Demand Media

College Recruiter

GetACoder

iFreelance

Project4hire

SimplyHired

بعض المواقع العربية والعالمية للبحث عن وظائف:

wzufa ,Indeed ,CareerBuilder ,Dice ,Glassdoor ,Gulf Talent ,Jobzella ,wuzzuf ,bayt

الكتابة: Shereen Badr