أسباب حرق الدهون الضعيف والحلول

الحرق الضعيف أسبابه و الحلول

اشهر سؤال بيتسأل ودايما اللي بيسأل السؤال ده متوقع اجابه من نوعيه اشرب جنزبيل وقرفه وزبادي بالمون او خد دوا يساعد على الحرق …
طبعا كل ده كلام فاضي واوهام ومش هاتسببلك غير الاحباط, لان الحقيقة مش بس مشكلة الحرق الضعيف كمان انت شكل جسمك في الغالب مش راضي عنه فما تتخيلش ان فيه مشروب او دوا هايحسن شكل جسمك ومناطق تجمع الدهون سواء كانت في الجزء العلوي او السفلي في الجسم.. فا متضيعش وقتك وفلوسك وتعذب نفسك وتضر صحتك بادويه ملهاش نتيجه ..
جايز بعض المشروبات العشبية الطبيعية ليها تأثير قليل في رفع معدل ضربات القلب وبالتبعية رفع الحرق اثناء عمل التمارين لكن الاساس هو الاتي:

اولا حرقك ضعيف بسبب الاتي :
– لازم تاكل علشان تخس, انك عملت انواع ريجيم كتير وكلها غلط واقل من 1000 سعر حراري في اليوم وخصوصا الحاجات اللي بتعتمد على نوع اكل واحد في اليوم او لبن وتمر او لقيمات او فاكهه بس او خضار بس او لحوم ودهون بس ده بيقتل عملية التمثيل الغذائي و الحرق وعلشان كده بتتخن من بق الميه وبيزود الطين بله وبيخلي الدهون تتخزن اكتر في المناطق اللي اصلا عايز تصلحها…
و اول ماتوقف الريجيم ده حتى لو رجعت تاكل صحي وتعمل دايت متوازن هاتتخن في الاول او على احسن الفروض هايحصلك ثبات وزن فتره.
-اغلب نشوياتك بيضاء يعني دقيق سكر رز ابيض مكرونات عيش ابيض
-انك قطعت النشويات تماما من اكلك
-مابتشربش كافايين من القهوة خصوصا
– انك مابتعملش اي نشاط رياضي سليم او حتى لو بتعمل مش بتلعب صح , الحرق علشان يرجع يشتغل بفعاليه لازم مجهود متوزع بين تمارين باوزان وهوائية
-انك بتاكل اكل مصنع ومن الشارع كتير حتى لو الكميات قليله
-كميات سكر كبيرة يوميا بدون معرفة اين يوجد السكر فا هم مش بس شاي وثهوة لا كمان المعجنات و الخبز والحلويات
-ممكن تكون بتاكل اكل صحي ورياضه وبرضه مش بتخس ده بسبب انك بتاكل اكتر من احتياجك

الحلول:
أولا تتاكد ان معندكش مشاكل صحية أدت لاختلال معدلات الايض في جسمك وده عن طريق مراجع طبيب واجراء بعض التحاليل
-تاكل سعرات مناسبه الرجاله مش اقل من 1400 و الستات مش اقل من 1200
-تلعب حديد لان وجود عضل في الجسم بيرفع معدل الحرق جدا وبيعالج عيوب الجسم واعاده توزيع الدهون وده للستات قبل الرجاله
-تاكل بروتين كافي وكلمه كافي يعني تحسب لكل كيلو من وزنك 1 جرام بروتين على الاقل ولو بتلعب رياضه قويه ممكن توصل ل 2 ج بروتين فا لو انت وزنك مثلا 80 تاخد 160 ج بروتين , وصدر الفرخه ال 100 ج مش معناه انه في 100 ج بروتين هو 25 ج بس فا هاتكتشف ان ليك بروتين كتير في اليوم وهاتخس عادي, وتنسى الكلام الفاضي بتاع الخضار الكتير , –ماتخافش تاكل بروتين كتير مادام انت سليم صحيا البروتين كويس جدا وملوش اضرار مادام بتاكل متنوع بين منتجات البان وسمك ولحوم وفراخ
-ماتقطعش النشويات ابدا بس بدلها بكامله الحبوب زي الشوفان الرز البني بقوليات الخضار الفاكهة
-الصبر لان جسمك علشان يتصلح بياخد وقت علشان يعالج اضرار الريجيمات الغلط اللي عملتها زمان وممكن تزيد شويه ودي علامه صحيه.
-ماتاكلش اي حاجه بتتباع في الكشك غير الميه ودي كمان مشكوك في امرها
-وقف اكل من الفاست فود ومحلات الشوارع
-شرب الميه الكافي يوميا من محسنات عملية الايض, حتى يتحول لون البول للون الشفاف
-الحفاظ على مواعيد ثابته للاكل يوميا
-شرب القهوة من كوبين لتلاته معقول ومحفز للحرق ومدر للبول

هاتعرف امتى ان حرقك اتحسن لما شهيتك تبقى تحت السيطره و لما تبطل تتخن من ريحة الاكل
لما تبوظ الدايت يوم او اتنين ومايأثرش على وزنك
ولما مع الوقت تبتدي تخس وفي نفس الوقت صحتك كويسه ومستوى نشاطك بيتحسن ولياقتك بتزيد

Writing rights to Safa7 el Fat